[وليدالمصري]

بدعت بأسماك وانت ادرج علي لطفك=يا مولى الالطاف ذي ما خافيه تخفاك
مليك الاملاك مالك ند في ملكك=مالي سواك اقصدك يا مالك الاملاك
يارب من جاك متلوي على حبلك=عبدك ترجاك تفعل للعباد ادراك
يا خير فكاك عندك للمشاكل فك=الحل منك ولا غيرك لها فكاك
والامر أمرك ولا باطلب سوى عفوك=مالي أمل عند ذى كلا ولا في ذاك
الجود جودك وانا بالجود من كفك=تجود بالجود وانجي من قد اتلجاك
يقول ابو نصر مهلك يالعجل مهلك=لا تطلب انسان لا تطلب سوى مولاك
الله ذي خالقك وذي تكفل بك=انسان مثلك ولا هو مقتدر ما اداك
اوصيك تقنع على ما اداه لك ربك=اذا تقنعت بالرزق القليل اغناك
وذي قد اعطا لذاك الشخص ذي مثلك=زله وقل رب حول لي بحق اسماك
يا قلب ابو نصر لا تزعل ولا تظنك=كم ناس مثلك يعيشوا في عيا واظناك
لا بد من حل اقطع باليقين الشك=يفك لاقد هي متشعبكه شعباك
مهما تكون الليالي كل ليل احلك=لابد ما تنجلي في دوره الافلاك
اسلك بمسلك وعند الله ميه مسلك=دبر لنفسك ولله دبرك ماعياك
وان كان دبرتنفسك يمكنك تهلك=وان دلك الله فتؤكل على ماهداك
ياصاح باوصيك لاتشكي لحد حالك=احفظ لسانك اذ اكثرت الكلام ارداك
لا اكثرت في الثرثره هو ينتقص قدرك=ولا تفارق لربعك يهكموك اعداك
ولا تعايد لذي مايحفظواعهدك=لا تصحب الا الذي مبداه من مبداك
كريم الاخلاق لانته محتوي شدك=ولو طلبته لحاجه قال ياماغلاك
أما عديم الوفاء تفعل معه جهدك=ويستشيرك ولا حزقه عليه اولاك
ولا صفاء الجو عنده ما ذكر جملك=تعلو عليه السخافه حلما يلقاك
يا زين ماعاد صنفه مستوا صنفك=قد السخافه غراير والنخيط اتناك
ياصاحب السخف خل السخف من فضلك=أو قد نسيت الظروف ذي عشت انا وياك
انا زميلك وانا عارف من اين اصلك=ايش الذي كبرك خل الجفاء خلاك
عارف بقدرك وعادك طفل في جهلك=لكن فلا قد معك وسط البنوك اشياك
لو مابه اشياك ماتقلب عليا اسمك=ان انت ذياك اناوانت سوا ياذاك
والله لوتمتلك ذي روسيه تملك=انت عديم الوفاءماحديقول يهناك
ان الوفاء والصفاء والشيمه افضل لك=ولا يذموك وانت تملك الالكاك
نصيحتي لك وحذرك ماتخذ حذرك=من راجلك ياصديقي في شراه اوفاك
ولاتقل لي ولا انا عاد باقولك=لا شك مالمال وابليس اللعين اغواك
كم قد نصحتك وكلمتك وعلمتك=أثأر قد ربي اعمى فكرتك واعماك
لا رحت في داهيه فالله لاردك=ماهمني من ربط في رجله الاسلاك
ديني لنفسي ودينك لك وابوك وامك=هو يبطل الليل لاقد كثرت الادياك
ياطارشي بارسلك ذلحينه اتحرك=لا حيث بارسلك بالخط واتعناك
ذلحين باعزمك في التكسي الكادلك=عزم لتوك تعز والعاصمه مأواك
سلم حروفي درك مولى العناء وادرك=للقايد أتخبرك قله بقاك أبقاك
ماقد سبق لاجل غيرك لاتقل لاجلك=علي سنان افتكر ذى الرمز مايغباك
يافندم الخط لك وامرك مطاع امرك=من صاحبك يحنجك بذا الشريط اهداك
يافندم احياك عندي مثلما عندك=بايرحم الله ذي جابك وذي رباك
ياشبل سنحان ذي يصبوا في المعرك=اناشهد ان في قبلها كم من المدماك
قلبك بوسطك واناقلبي كما قلبك=ما جاك جاني وماجاني لوحدي جاك
يالقايد المحترم شكرت مانصفتك=لو قلت باننصفك بالشكر مانصفناك
ازكاء التحيات لك للكوك ماتلتك=وقسمه من يدك لاصحابكم واصناك
واحذر من اهل الشبك مادبهم دابك=قد عينهم بي وبك يشتوا لنا الارباك
باحذرك وانذرك كم اننا احبك=خايف من الغدر بك من مكر ذي يشناك
والعفو مابجرحك لانته ولاغيرك=أمشي على السهل والا كل شي يفداك
يارب انا استغفرك سترك علي سترك=انا تعوذت بك من شي وفيه اشراك
ذكر النبي كل مافوج الصبا تحرك=وهز الاشجار واغصان العنب والراك