[وليدالمصري]

سبحت باسماك ياملاك واستغفر
** يا عدل برهان يا مولى العطايابار

يا صاحب الستر سترك ياكريم استر
** واغفر لي الذنب والزلات يا ستار

وبدل العسر يسرا ياملك يسر
** يارب سهّل طريقي لا الطريق اعسار

يقول أخو عبده اني قد طعمت المر
** من صدق لا عاد ابا فله ولا اشتي دار

اليوم ما زد ظهر لي كيف باسبّر
** الجيب واليد خالي ما امتلك دينار

صنّف لي اشعب وصدقته وقمت اعمر
** اثار ما يعمر الا من معه مليار

من قام يعمر وما شي في يده مدبر
** هذه وصيه لكم ياهل البناء وانذار

قد كنت باجنن وعاداحنا في الموثر
** من حكم الاسطى المدي والشاقي المكّار

ما لحظه الا وانا فى الأمر متفكر
** ليلي ويومي وانا في باحة الأفكار

ولا معي مال ذي باعتاش به واتجر
** ولا اجد اشياك بنكية ولا بخّار

من اين لي ذي يشجعني وانا ماقدر
** على التملاق ماناشي من الشطار

انا لأجل العمارة سرت متحير
** قلّبت صلّبت وان ماشي لها منقار

وكل صاحب ترجيته يقول اصبر
** والصبر ساعة سنه عند الفهن والحار

من بعض الاصحاب انا عشرين متشكّر
** اذا طلبته لحاجه فالجواب اعذار

حتى زعيم اليمن قد كنت متباشر
** على معونه من الشاب الفتى المغوار

حتى وما زلت حتى الآن مستنظر
** بالجود من حضرتك يا ثاير الثوار

لو كنت في منصبك والله ما قصّر
** وانت في منصبي من جملة القصّار

لا اعطف على كل واحدمن سخاء واكثر
** وبالأخص الذي با ينظم الأشعار

وان قلت هذا لأجل المدح مافكّر
** لأنك انسان كالغيث الهني المدرار

وان قلت حظي انا والرزق متعسر
** فاستغفر الله ما ناشي من الكفّار

انا رجل عسكري فى الجيش متعسكر
** والعسكره ما معي منها سوى الطوبار

يقول ابو فتحي الغرسي وبن ناصر
** من المظلات ذي هم جندك الأنصار

لا راتب الشهر يكفيني لحق البر
** فكيف بالكهرباء والماء والاستئجار

وكم تكاليف انا يا صاح متحسر
** من ضيق حالي وضيقة صاحبي والجار

وان قلت باسمر شويه ما قدرت اسمر
** في بيت الايجار جالس فوق جمر النار

وصاحب البيت بعد القات متغير
** يطفّح النفس بالصيّاح والبهرار

ما استرت اقع حر من طاغوت مستعمر
** مؤجر البيت مستعمر لي استعمار

يجي مغلّس ولا ما حصّلك يبكر
** يهددك بالخروج الثار ياهل الثار

لو قد لقيت قبر للايجار لاستأجر
** وارتاح من علّتي واسكه من الايجار

جرى لنا سعف ما يجري على كافر
** اتعبت قلبي وكسّرت ارجلي دوّار

طلعه ونزله سنه يمكن وخمسه اشهر
** من تحت قشلة نقم لا شرفةالمحضار

فهل لذا حل أو هل ثم مستنكر
** هل القرارات تتنفذ قفا الاصدار

ما بال شعب اليمن لليوم متأخر
** وقد كثير الشعوب ذي تصنع الاقمار

يا ليت شعري متى نجني ونستثمر
** خيرات شعب اليمن فى البرّ والأبحار

متى ستصفى الضمائر عندما نضمر
** نسير في خط ما فينا ولا غدار

والعفو فيما هدي من زايد او قاصر
** لأن هذا الزمان يخشى من الأخطار

والختم صليت ما قد همشل الماطر
** صلاه باخلاص منا للنبي المختار