الشاعر الكبير/ ابو محمد مسعد بن صالح الاشول

[وليدالمصري]

بطـــاقه تعريفيه

مسعد الاشول من قبيلة آل الصوفي مديرية جبن محافظة الضالع

شاعر بحجم الوطن الكبير لان وطنيته اكبر من كل وصف يمكن ان نصفه به فقد وجدنا قصائده

تحمل الاماني للشعب وهموم ابناء اليمن الواحد له مساجلات عديده مع اكبر شعراء الوطن وله قصائد خاصه

وكذلك ردود على شعراء وايضا في الغزل له باع كبير وقد بحثت عن قصائده التي وصلتنا عن طريق الاستاذ نصر

سماحه ولي الشرف ان اقوم بنقلها لمنتدى اب الخضراء لكي يكون مرجع لمن يريد ان يعرف الشاعر واشعاره

 

[وليدالمصري]

مع المحبين نسهـر قـال اخـو غالـب
ليلـة وباقـي ليالـي العمـر متعوبـه
والمـلـك لله لا بـايـع ولا كـاسـب
يخذ من المـال لا قبـره سـوى ثوبـه
لو يصبـر الدهـر لا آكـل ولا شـارب
أو يملك أهرام فـوق البحـر منصوبـه
لي عشرالى الآن من ارض الوطن غايب
لا اريد اسافر ولا اريـد اعلـن التوبـه
لاغير لا شوف من سافر رجـع تاعـب
يرجع مكوى علـى راسـه وعرقوبـه
والخطـوة اقـدار للجايـئ وللـذاهـب
ما صادف المـرء فـي دنيـاه مكتوبـه
مهما تعذبـت فـي المهجـر وناراغـب
ماشي تعيبـه وهـي للنفـس مرغوبـه
ومن نقدنـي يصارحنـي ونـا جـاوب
لافي اليمن خير من حقده ومـن حوبـه
تآمـروا فـي إزالـت نجمـه الثاقـب
ذي نوره آضاء جبال الشطـر وشعوبـه
برهن لهم من المخطـي مـن الصائـب
اسـس مشاريـع معروفـه ومحبوبـه
الطفل يبكي على الحمدي كمـا الشايـب
ذي زال عنهم زمـان الـذل واسلوبـه
جريمـة القـتـل مسؤلـيـة النـايـب
وقايـد الجيـش والحـارس ومندوبـه
مهما تعمـرت يابـن الغشمـي العايـب
من قتّل النـاس بـد النـاس يلقوابـه
ما بدنـا فيـك فكـرك والأمـل كـاذب
سياستـك ترجـع الدمـام مصحـوبـه
بنـار الأحـرار ذي باروتهـا ذايــب
كم من بطل في شمال الشعب واجنوبـه
لايرهب الموت من ظالم ومـن غاطـب
ويصبـر ايـام مـن اكلـه ومشروبـه
شن الدعايـات مهمـا يكتـب الكاتـب
ما عندنا مـن كـلام الكـذب مرحوبـه
قد انتهـا الـذل وانتـه منهـي خايـب
ومـن بجنبـك يديـر افكـار مسلوبـه
يارب سلطان من فوق الفـرس راكـب
في مر الأيـام يرجـع تحـت مركوبـه
يا ساعة الثار ياوقـت القضـاء قـارب
لا تحـرم انفـاس محرومـه وملهوبـه
يكفِّي الهجـر بيـن البنـت والخاطـب
يعيش محـروم فـي وحـده وغيبوبـه
ويتـرك الأهـل والجيـران ولصاحـب
يموت غايب وهـي عـذرا ومخطوبـه
ياكل مجروح من ارض اليمـن هـارب
لا تجعل النفس تحت اليـاس مرهوبـة
بينك وبيـن اليمـن ربطيـن متقـارب
الأهل فـي حاجتـك والأرض مصلوبـه
يـارب ترحـم وتقبـل دعـوة الطالـب
تعيد من غـاب عـن اهلـه ومحبوبـه
.

 

[وليدالمصري]

الاشول قال يا هاجسي ***هات الزانة القاتلـه
مادام السوادي خرج***عن حده ومد الحبـال
هذه المره الخامسه***كلمـا قلـت بـا عدلـه
وارسم له طريق الامان***الايمن تحـول شمـال
بدي شجعه يستمر***فـي شغلـه ومستقبلـه
حتى لو طويل العمر***يزعل قد معه رأس مـال
او يمكن دبـي تفتقـر***والا حـدا مايكفلـه
زي ما صار في المملكه***ماهو وهم والا احتمال
كم عالـم غنـي وافتقر***والايـام متداولـه
ماحد في غناه استمـر***لله الغنـى والكمـال
قلنا حسب سن الصغر***مثل الابن با اعاملـه
لكن قد حفـر حفرته***لمـا كفـر ام العيـال
ذي تدي صلاة العشاء***في صف النساء الاولة
هذه الخصلة الثانيه***ذي فيها من اربع خصـال
ذي معنى الحديث اختصر***فيهن والنبـي علله
لما قال تربت يداك***خذ بالدين قبـل الجمـال
وانا خذتهن كلهن***فيها اربع خصـال كاملـه
في المقياس لاشوفها***مثل الشمس جنب الهلال
واللي جاب لك وصفها***هومهزوم من داخله
في ميزان عقله خلل***ما همـه بقيلـه وقـال
وان كنت انت صنفتها***ترضي نفسك الفاشله
لما شفت نجمي ظهر***تلجأ لا كـلام العطـال
با تدفع ثمـن غلطتك***هـذا امـر لا تجهلـه
مهما ابليس يوقف معك***هي فترة زمان انتقال
حتى تنشب المعركه***من ذا الباب ذي يدخلـه
شاينكص على عاقبه***لو شاف المراحل طـوال
بايخلص عليك العتد***ماانا الحب فـي سنبلـة
لو بدي كلام الهجاء***عندي في المخازن ابـال
وانته عاد غصنك طري***لو هز النسيم انطلـه
عجزتك في النازله***وينك من صعـود الجبـال
عادك تسعتعشـر سنه***لمـا تلحـق القافلـه
لا تغتر في خبرتك***مهما كنت راعـي جمـال
عاد الفـرق مابيننا***مثـل الفـرض والنافلـة
كثر الهرج ماينفعك***شا تصبح عديـم القبـال
والشاعر متى قد خلف***قولـه غيـر مايفعلـه
اول امر يحصل معه***ينقص في عيون الرجـال
حتى لو حـدا منهم***فـي تعقيبهـم جاملـه
كذبه دين في عاتقه***ماله مـن قضاهـا محـال
خذ لك من كلامي عبر***ذي مايستمع عاقلـه
واعطا النفس رغباتها***تهوي به طريق الضـلال
حتى لا تعيـد الغلط***هـذا البـاب بانقفلـه
اذا انته تحترم عمتك ***لا تعطي لفاسق مجـال
مابدي يضيع الهدف***او نخرج عـن المسألـه
ذي لي عام من اجلها***لا دور جواب السـؤال
عن موضوعك الفارسي***ذي سعدون قد نزله
في المجلس وحيد السماء***نزل صورتك بالعقال
وانته في قصيد الغزل***ذه تخـرج وذه واصلـه
صارحني وكن واقعي***هذا حلم والا خيـال
شا تصبح قتيل الهوى***بعـد النجمـه الافلـه
قلت القلب قد شلته***منك والكبد والطحـال
والباقي معانا الجسد***افضـل حـل بانغسلـه
ونحطك بمتحف دبي***تبقـى للعواشـق مثـال
بو صنعاء تعاطف معك***وامست دمعته سايلـه
والمدرم في الطايره***في ساعات كان الوصـال
لكن للاسف ماوجد***غيـر اهنـود تستقبلـه
لا يفهم لغه هنديه***او يقدر علـى الاتصـال
وامسى في خليج العرب***يتفرج على ساحلـه
واقضى ليلته في دبي***لاربـه دعـاء وابتهـال
لما شـاف خيراتها***يأخذهـا العـدو كاملـة
والمبروك من بدوها***من يأكـل شباتـي ودال
ذي معظم شباب اليمن***شيدها على كاهلـه
من دمه دفع مهرها***والهندي يأخذها حـلال
وانته قلت لي جيشهـا***او قواتهـا الباسلـه
ما تخرج من المعركه***حتى تنهـي الاحتـلال
والمعـروف سكانها***جملـة بـدو مترحـلـه
ما ظن احدا منهم***شارك في صفوف القتـال
والثاني جيـوش العرب***والحكـام متخاذلـه
مهما الغرب يهزأ بهم***ردوهـا مغانـي وبـال
من بو ظبي والشارقه***في الساعه مائـه ناقلـه
تعبر مصر في حريه***ماتدفـع رسـوم القنـال
خلو كل مسلم حنب***في شربه وفـي مأكلـه
يرتاحو بخيراتنا***واحنـا فـي حيـاة النكـال
امريكه ودجالها***يأخـذ كـل ماطـاب لـه
لو يعقد بحكامنا***نلحقهـا فـرح واحتفـال
يكفي ياطويل العمر***منـي والسـلام اقبلـه
ماتثمر شـروع العنب***والزيتـون والبرتقـال
واهد الابن عاهد معك***وابلغ جملـة العائلـة
بالوردي وبالمستكا***ممزوجه مع عطـر عـال
واختمها بذكر النبي***مولى السيـره الفاضلـه
ماريح الشمال اقبلت***تجري بالسحاب الثقال
وارخت في مزون المطر***فوق الخصب والقاحله
ما الزاير يزور القرى***ذي ليها تشد الرحـال




وهذا هو الجواب من الشاعر ابو عاهد السوادي

بن سواد ماهمني.. لشول لو معه قنبله
= ماباخاف منه وانا.. فالميدان سيد الرجال

حيرته بسن الصغر.. واكسب مرحله مرحله
= والشيبه بشوفه تعب.. واحنا والمراحل طوال

يرسل بدع هذا السنه.. والثاني في المقبله
= واقبل حينها يهتري... مظهر شدة الافتعال

ويله لو نهم هاجسي.. في لحظات بيكنسله
= ماهل قلت بانرحمه.. ماداعي لكشف الجلال

ينصحني وفي نيته.. يقرء سورة الزلزلة
= فالظاهر معي والخفاء.. يطعني بسم النبال

لكن واجبي بشكره.. فالظاهر وبا رد له
= لما شوف منه غلط.. ولا في مسيره ميال

أماالشغل ماهمني.. دامه بيد من سهله
= ماجاني صرفته قبل.. مافكر بكسب الريال

عندي عايله باليمن.. والاخرى هنا نازله
= والعادات مافكها.. متمسك بها لا ازال

كاسب دعوة اهلي فقط.. ذا طبعي ولابدله
= ون جار الزمن ضدنا.. بانمسك طريق الطوال

واما عمتي حقها.. في ذمة من اتأوله
= لو غلطان في حقها.. باحكم بخمسه عيال

أم اولادك الطاهرة.. تبقى طاهره فاضله
= لكن قصدي الثانيه.. ذيما خذتها بالحلال

لاعبني نقا في نقا.. خل النيه العاطله
= لاتخلط بلولي حصى.. وارسلته بنفس الشوال

لو بلعب على لعبتك.. تتبهذل معي بهذله
= باسجل هدف في هدف.. واخرجتك من المونديال

واما الفارسيه غلط.. من غلطاتك الهايله
= نبهتك وقلت الولد.. بايخجل متى قال خال

سعدون الذي ورطك.. لنه يقصد البلبله
= وانت الليل واساريه.. بانسري نصيف الليال

وايضاً صورتي عاديه.. لكن عندك المشكله
= لابس لبس غربي جبر!.. ها وينه ووين العقال؟

واما عن قصيد الغزل.. ياكم ناس متغزله
= ما شي شاعر الا وهو.. يذكر في قصيده غزال

حتى انته معك مثلنا.. هذا امر ما نجهله
= لكن لك ظروفك نعم.. ماترضى بقيلة وقال

يمكن خوف ولا حيا.. تطلع صورتك فاشله
= في المسجد امام البشر.. باتطلع امير الضلال

والمدرم وصل عندنا.. واسال مين ذي قابله
= قابلته ونعم الرجل.. يضرب به صحيح المثال

واتجول نعم في دبي.. واستغرب وزيد اسأله
= عن وصفه و ماخالجه.. من حُسن العمير الطوال

ماهي حسب قولك عشش.. فيها بدو مترحله
= والمبروك من بدوها.. من ياكل شباتي ودال

وينك وين من بحرها.. ذي ليه السفن داخله
= وينك من سناتر دبي.. كالسيتي وسوق المنال

وينك من جسور الطرق.. ذي تحمل مية حافله
= قبله للتطور نعم.. طول ايامها فاحتفال

والحكام ونعم بهم.. من عربان متئصله
= والشعب الكريم الأبي.. يتحلى بخير الخصال

شل الحقد شل الحسد.. من قبلك ترى ياكله
= شفهم مننا واهلنا.. ماشي حول هذا جدال

واوضاع العرب كلهم.. واحد.. ماهنا معضله
= ويش الفرق مابيننا.. واحنا حال واحد بحال

كل الشر من عندكم.. ذيما تقروا البسمله
= لكن شمسكم لااشرقت.. باتغرب بخلف التلال

والايام شفها دول.. والنكسات متنقله
= والحالات حسب المثل.. لو تبقى اسيره محال

والسوفيت شاهد بذا.. والادوار متحوله
= والراكب على خيلته.. بايركب هزيل البغال

حتى انته جواز السفر.. باترميه بالمزبله
= باترجع هنا او جُبن.. حتى لو يطول المطال

اما انته وانا يانمر.. ماجاني فبستقبله
= لما تعتذر لي علن.. ولا تعلن الاعتزال

واحذر من كلام الغلط.. خل الكلمه الخامله
= باتحنب معيا حنب.. لوهزت رياح الشمال

لني لو نويت اتعبك.. عندي جن متجوله
= اسرك عندهم مثلما.. شربه من لذيذ الزلال

شفني من سلالة عرب.. كل الصعب تستهله
= احنا اقوالنا تقترن.. في توقيتها بالفعال

ناقشني بوضع اليمن.. عن حاله ومستقبله
= خل الفارسيه ترى.. مابدل بثوبي بدال

واتقبل تحياتنا.. واجمل ورد تتقبله
= من عندي وحيد السماء.. وابن الزمري بالمثال

واختمها بذكر النبي.. واله.. يالله ان تجعله
= يفرح مننا كلنا.. يوم الحشر والانتقال

 

[وليدالمصري]

وهذا هو البدع الذي ارسلته الى الشاعر ابو محمد الاشول

قال اخو قيس يافـوج النسايـم تمهـل
واعطني فوح من نود الزهور الحسينـه
واسقني من طشاش المزن لاقـد تبلـل
كوكب الارض حن تهمل عليـه الزنينـه
هات لي هات فالهاجس نوى اليوم ينهل
بالقوافي من اعماق البحـور الرصينـه
مذهب الجـود ذي مامنـه الجيـد ميـل
والوفي لـه تليـن الشمخـات الزبينـه
هكذا الجـود والعـادات ماجيـد يفسـل
لاولا الفسـل مثمـار الجمالـه تزينـه
والادب ساحته عضمى ومن شلها شـل
بالجـداره ولا بالعنجهـه والضغيـنـه
فالاديب البطـل عـن موقعـه ماتبـدل
كالاسد يحكم الساحـه ويحمـي عرينـه
يدعم الجيل والناشىء ابـد مـا بيغفـل
عن قدومـه وتشجيعـه ودومـا يعينـه
هكذا واجـب القـدوه وماضـن يهمـل
ذا الطلب عند منهم حاكميـن السفينـه
ذاخرج فصل والثاني على الفـور ينقـل
باحدث النت عبـر المنتـدى والكبينـه
يا رسول الفتى المصري قدك خير مرسل
وصـل القـول للغالـي وقبـل جبينـه
مسعد الشهم ذروة شهم من اّل الاشـول
فارس الحد صمصـام الحيـود المتينـه
جبة الورد والريحان مـن كـل مشتـل
في ربوع اليمـن كامـل مدينـه مدينـه
واهده العطر بأعلى ماركـه قـد تسجـل
واسـأل الله للغالـي يبـارك سنيـنـه
قدر منـي لمـن يستاهـل القـدر الاول
ذي انوفـه تعانـق للسحـاب الزكينـه
قدوة الشعر مصباح الادب حيـن يشعـل
شاسع الصيت مقدام الحصون الحصينـة
انتهى فصل والثالـث بحرفـه تسلسـل
يشرح اوضاع يستفسر بزينـه وشينـه
هيكل الشعر متذبـذب وموجـه تكنسـل
وايش الاسباب يا ارباب العقول الفطينة
كان(مخلد)ملـك للشعـر وايضـا تكفـل
باهتمامه لقول النشئ فـي كـل حينـه
ارتقى الشعر في عهده وفي كل محفـل
كان للشعر مقـداره ولـه الـف زينـه
وانما الان يا قهري من الوضع ذي حل
وضع يجبر فؤاد الحـر يصـدح انينـه
ساحة الشعر معجونه ومـن جـا تبلبـل
والملحن بلحـن اهـوج يـدوي رنينـه
كل شاعر حسب نفسه شبيـه المهلهـل
واصبحت شهرته من ما معه في الخزينه
وان اتاهم قلم ناشئ ولـو كـان بركـل
يستخفـو بقدراتـه وينهـو شنيـنـه
ترجم الوضع يا مسعد وقل ما هو الحـل
ام هو الوضع عندي جا بصوره حزينـه
ياسياج الادب والتاج والصقـر الاحجـل
قلب اخو قيس من وضع الادب يا حنينه
قد سألتك بحكـم انـك محنـك ومحتـل
قدر عالي وتعرف في الامـور المبينـه
وانما لم فقل قد عقل اخو قيـس مختـل
والجـوارح تحركهـن بجسمـه مكينـه
منتظـر ردك الشافـي ومنـي تقـبـل
بالتحيه وعود اصلـي يصلكـم طحينـه
والصلاه تبلـغ المختـار طـه المجلـل
صفوة الخلـق ذي نـور لبقعـا بدينـه

وهذا هو الجواب المتميز من الشاعر الاصيل ابو محمد








ابـدع القـول بسـم الله والله اسـئـل
ستر الاحوال في كل الامـور استعينـه
ذي رفع سبع في ستـه وقـدر وفصٌـل
كوٌن الكون وانشئ خلق من اصل طينـه
قال اخو غالب البدٌاع مرحـب ومسهـل
ضيف غالي وصل لا فوق رأسه وعينه
مرحبا الاف في خو قيس ما شن واهمل
في قدوم الفتى جانا الفـرح والسكينـه
في وليد الوفا والمجـد لا يمكـن ابخـل
كيف واهله لعـرش المجـد متربٌعينـه
رحٌبي يـا عناقيـد العنـب والسٌفرجـل
وانت يا وادي امريكـه بنخلـه وتينـه
وانت رحب معي يا ساجي الطرف الاكحل
يامن القلب له عاميـن عنـدك رهينـه
فرٌش الورد ذي تروى غصونه من الطٌل
حب واكرام لا تبخـل بقطـف الجنينـه
وانت يا هاجسي طلع من النوع الافضل
خل ذي فوق موج البحر واغرف معينـه
لا يجف القلم واصبـح كلامـي مخلـل
بعدمـا جاتنـي منـه جواهـر رصينـه
وانت يا مرسلي سرعه مع الفوج الاول
لا تأخر عليـه ارجـع جوابـي بحينـه
رش بالورد رأسه والقميـص المفصٌـل
والشٌمطري وعطر العود من خير عينـه
ما اقدر اوفي وليد الصدق ميزانه اثقـل
في صراحه وذا اول دور بينـي وبينـه
انما با نحـاول مـا يناسـب ويسهـل
في بلـد خلٌـت الانسـان تابـع قرينـه
خلٌت المفتهن حيـران والحـاذق اهبـل
نستمر في الخطأ رغـم اننـا عارفينـه
البلد طيبـه لاكـن بهـا جنـس منحـل
عنصريـه وتحكمهـا عصابـه لعينـه
خلٌت الروس والالمان مـن بطشهـا ذل
والعرب في دفاترهـم تسمـى الامينـه
فضٌلوها على الاردن وبيـروت والتٌـل
للسياحه وارض القـدس منهـا حزينـه
خلٌت الشرق مستسلـم وشعبـه مكتٌـل
عادها عايزه ضـرب الحـرم والمدينـه
كيف يهنـا لهـم هـذا وبغـداد محتـل
للاسف واهلهـا كانـو حمـاة الظٌعينـه
واليمن شعبها عايش في الدرك الاسفـل
عـاد بـاب النفـس حكٌامهـا قافلينـه
مامع الشعب غير القات سهـره ومقيـل
هكـذا بدهـم ينسـى حياتـه وديـنـه
علقم السم من اسرائيـل يأتـي معسـل
بالهنا والشفـا رشـو عليهـا طحينـه
اعتنو فيه والاطفال مـن غيـر مأكـل
اتقوا الله فـي الاطفـال يـا زارعينـه
اين راح العنب ذي كـان فيهـا مشكٌـل
اين حب الذره ذي كـان يمـلا جرينـه
اه مسكين هذا الشعب كـم قـد تبهـذل
كلمـا راد رفـع الظلـم طالـت سنينـه
ناصف القرن والشاوش مـا قـد تبـدٌل
ذي في البنـك والمخبـاه ماقـد كفينـه
ذا خرج فصل والثانـي بيأتـي مفصٌـل
عندما يحتكـم ميـزان جيمـي لسينـه
صح ما قلت يا خو قيس بو لوزه ابـذل
في عطا الشعر وافلح في رضا عاشقينه
لـو دخـل معركـه كبٌروشهٌـد وهلٌـل
كان ينزل على المسؤل وامسى سجينـه
لاكن الصٌمبحـي ذي وقٌـد النارواشعـل
هو وابو قيس غذوها بكم مـن سمينـه
راح ابو لوز والشعٌـار تأتـي وترحـل
تحت حكم القدر طيٌـات شعلـى وزينـه
والملحـن عمـل مشـوار غنٌـا ومثٌـل
لاكن اشخـاص كانـو بالخفـا مالكينـه
كم طلبته وله رسلت كـم مـن مسلسـل
اهملـه واستلـم كـل الـذي دافعينـه
والنهايه تريد الحل مـن عنـد الاشـول
كيف وانته وانا نعجن بنفـس العجينـه
انما الجيد ذي يعفي ويصفـح ويجهـل
فالامـور التـي تأتيـه مـن حاسدينـه
انت ذي با تظلٌي راكب المهـر الاحجـل
هكذا رأي بـن الاشـول وهـذا يقينـه
ختمها في رسول الله مـا ظـم واسـدل
كل عابد مـن اصحابـه ومـن تابعينه

 

[وليدالمصري]

الاشول قال ياسوادي***قم جهـز دبـي للمحفـل
قالوا بوش ليها واصل***لا تبخل فـي استقبالـه
حتى لاتقع في فتنه***والا الشيـخ منـك يزعـل
وتكون السبب لاخوانك***تمسو من دبـي رحالـه
اعملها ضيافت بدوي***والبدوي ذهـب مايذحـل
هذا رأي الاشول والله***الشاهد علـى مـا قالـه
حسب المعرفه والجوره***ماقد شفت بدوي يبخـل
لاكـن لاقـدك متمدن***خليـت الكـرم لابطالـه
قد يمكـن يـزور الشقرى***فـالاردن وبايتغسـل
في قصر الملك عبدالله***والصابون من حق خالـه
ذي جابه معه مـن لندن***لمـا زارهـا وتجـول
وتعـرف علـى خالاته***كمـن مومسـه ميالـه
او يمكن تكون الرحله***للقلعه والى بـو زعبـل
يعرف من ضحايا الحمله***ذي قامت بها الجلالـه
والسوداء نيابه عنه***في السبـع الـدول تتنقـل
وتوقع رسوم الجزيه***مـن بترولكـم واحقالـه
ذي كان السلاح القاتل***في شعب العراق المحتـل
ستعشر سنه واصلتوا***تدميـره وقتـل اطفالـه
انتوا ترقصوا في المعرض***والشعب العراقي يقتل
قلي اين جات الهمه***في هـذا الزمـن واجيالـه
لاترجـع تلـوم الغازي***هولبـا طلبكـم واقبـل
اعطيتوا له اجمل فرصه***ذي برد جميع اغلالـه
طلعتـوه يابوعاهد***للقمـه وهـو كـان اسفـل
لولا نفطكـم ياشاطر***ماعنـده ثمـن سروالـه
ايش المعذره والحيله***لما كـل مرضـع تذهـل
عما ترضعـه والمجرم***متحمـل جميـع اثقالـه
لـو هـذا هدفهـم كله***بانصبـر وبانتحـمـل
لاكن الهدف والمغزى***حرب الديـن واستئصالـه
وانتوا يانجوم المجلس***قيلتـوا مـع مـن قيـل
ثابت في الخبر مستلقي***والحمري قفـل جوالـه
والعلفي بتلها عرضى***للقسم السياسـي حـول
مدري كيف هذه الفكره***جا تصنيفها فـي بالـه
وانته يامدير الشعبي***طبل لك مـع مـن طبـل
من اجل الكراسي ضاعت***خيرات الوطن وامواله
لو خرجت مافي قلبي***قد كان الخليـج اتزلـزل
لاكن قلت رحمه فيكـم***لا تبقـوا علينـا عالـه
يكفي ذي وقع في الماضي*في حرب الخليـج الاول
كنا في الشوارع نصبح*عنـد النـاس بالحصالـه
مانا شـوف يابوعاهد***ماعنـدك عليـا مدخـل
الا قولتـك يـا شيبه***ماهـي عندنـا بطـالـه
لو تعرف مقام الشايب***في يوم القيامـه افضـل
ممن يدهنه بالاسود*** ويخضب رمـوش اسبالـه
وانتـه عـادنـا متأكد***باتـدهـن وباتتكـحـل
لاجل الفارسيه تفتح***رمـش اعيانهـا القتالـه
ذي قالوا تريدك تخرج***من مالك ومن بن حمبـل
وابن الشافعي ذي ماحد***نال العلم ذي قـد نالـه
هذا الفصل الاول كامل***والثاني تسمـع واعقـل
ما ريد الكلام العاطـل***او كتبـه بـلا بسمالـه
لاني كل مازليتك***فـي ضربـه لسانـك يطـول
ما ادري هي دواعه منك***او قد شي معك شغالـه
حتى لو كتبت الكلمه***لاعندك بسرعـه توصـل
وتجوب لعمك مسعد***في الموضوع قبل ارسالـه
شوف لو عاد قلبي يعلم***واحـد بيننـا يتدخـل
لا اهجم بالسلاح الذري***وافجـر قنبلـه سيالـه
قد انا وانت وسط الملعب***حتى اموت ولا تقتـل
ماراكـب حمـاره والله***مايدخـل مـع الخيالـه
مادامك تحب السهره***وسـع مجلسـك للمقيـل
وان بدك دخول امريكه***مني رخصتـك وصالـه
وان ماقدرت انا عاملها***با اخلي سماحـه يكفـل
والصوفي مجهز شغلك***باتحـرس لـه البقالـه
مابا نطرحـك للعجما***لـو بانتبعـك بالصمـول
او نرضى علـى مجلسنا***بعـدك يعلنـوا قفالـه
يكفـي لاهنـا والباقي***باخلـيـه للمستقـبـل
عاد الزرع وسط الوادي***والكيـال ماقـد كالـه
وانته يالعزيز الغالي***مني لـك تحيـات اجمـل
من عرف الشقر والعوده***والوردي جميع اشكاله
واختمها بمن جاء وصفه***كامل في الكتاب المنزل
مايقرأ الحروف القاري***في سرده وفـي رتالـه




جواب الشاعر السوادي على الاشول

بن سواد لوجاء ضيفي *** والله ماتراجـع وافسـل
باقدم لضيفي حقـه *** حسـب المقـدره والحالـه
عاده من زمـان اجـدادي *** لا تُمحـى ولاتتبـدل
خذها والدي من جده *** والوالـد منحهـا انجالـه
ماحد مثلنا يامسعد *** فـي كـل العصـور اتقبيـل
تلقـى ضيفنـا متبسـم *** فـي قفايتـه واقبالـه
حتى بوش لو جاء عندي *** ماهي من عويدي ببخل
باقيس الكـرم فـي عرفـي *** مابعاملـه بعمالـه
ون يوصل دبي والشقراء *** بايلقى امامـه جحفـل
بايلقـى مراسـم دولـه *** كـل اقطابهـا خيالـه
وانته قـد يجيبـك جنبـه *** لنـك فالمقـام الأول
من يو اس ايه امريكي *** تابعه لـه بايـت حالـه
عندي شيخ مانا منكر *** لكن عاده ارحـم وافضـل
من شيخك ابو زناره *** ذي تتبـع جميـع اقوالـه
والجزيه قده مستغني *** من دفع الظريبه يا اشـول
في وسط الكنسيه يدعي *** لامثالك تزيـد اموالـه
من جيبك ومن مدخولك *** كم دمـر وياكـم قتـل
مثلك من رفع له راسـه *** لمانـال ذي قـد نالـه
ون تنكر كلامي هـذا *** فتفضـل دليـل اتفضـل
وينك يوم كل امريكا *** تستنكـر شنيـع اعمالـه
ياكمن مسيره سارت *** ضد الحرب نـو لاتشعـل
وانته وسط بيتك جالس *** والمجرم يسوق ارتالـه
لكنـه برغـم القـوه والنصـر الـذي مـا اتسجـل
جيشه ذي وصلنا غازي *** ماتغفى تمـام اسبالـه
شوف السي إن أن واتفرج *** جيشه كم وكم يتبهذل
حد يقتل وحد لو يرجع *** يرجع له علـى حمالـه
شف دم العرب مايبرد *** أو يقبل على ارضه محتل
والشاهد أمامك واضح *** شف كم هي دماء سيالـه
لكن كيف باتفهمها *** قد مخـك خـلاص اتغسـل
مادامك تقول ان احنا *** من يدفـع ثمـن سروالـه
أنته باتحاسب وحدك *** لمـا كـل مرضـع تذهـل
محنـا غصـب عنـا جانـا *** ولا ودنـا نغتالـه
واما عن نجوم المجلـس *** لاتسـأل ولاتتسائـل
مثلك منتظـر عودتهـم *** لمـا يقبلـوا وصالـه
الحمري تراه اتقاعـد *** واطلـق مهرتـه تتجـول
من ساحل عدن لاالبيضاء *** لاحده وصل تجوالـه
والعلفي مكانه غارق *** في وسط السياسي طربـل
واليهري على ماتعهد *** يعزف لـه علـى موالـه
والساحة تراها خالي *** خوفـي يانمـر تتكنسـل
من بعد ارتحال القايد *** ذيما حد مسـك مشعالـه
والتهديد لو باينفـع *** هـدد كـل واحـد واعمـل
ماتقـدر ولاتتـردد *** ماحـد بايقـع لـك عالـه
لو شي بيدك اخرج واهدر *** من يزعل فخله يزعل
ون تهـدر امامـك ناقـه *** مالـك منهـا بوالـه
لكنك بحسب اقوالـي *** ذي قـد قلتهـا مـن أول
شيبه قد تزلزل عظمه *** وآنـا زدت لـه زلزالـه
واما بنت فارس غلطه . واتأكـد مـن اللـي رسـل
معلومه غلط رسلهـا *** وانتـه تعتمـد مرسالـه
بالرغم ان لوشي عندي *** من فارس ترى مابخجل
قد هي مسلمه لولا ابني *** بايخجل يقل من خالـه
إلا انته صراحه قلي *** عن بنت المسيحـي ميكـل
قصتها معك مشهورة *** والعهـده علـى ذي قالـه
قصة ساخنه يامسعد *** لولا خوفـي إنـك تزعـل
لاهوليـود بارسلهـا *** يالـه فلـم والله يـالـه
هذا فصل شامل كامل *** والثانـي عليـك اتمهـل
لي بيرق براس القمـه *** ماتقـدر علـى نزالـه
لكن حسب ما يبدو لي *** عاد المرحلـه باتطـول
مادامـك مجهـز ذري *** وايضـاً قنبلـه سيالـه
لكنك كمـا القذافـي *** ذي هـدد وعقـب اتفشـل
لما شاف نار الاعداء *** في شـط العـرب شعالـه
مثله صدق باتستسلم *** لو سقت السحاب المُثقـل
باتقبل برايه بيضـاء *** ماتدخـل معـي مقتالـه
واثق من كلامـي واثـق *** لاواهـم ولا بتخيـل
واسأل عن كلامي لعداء *** والحرب اسأله واسجاله
جاهز لك لوحدي وارفض *** أي انسـان بايتدخـل
مادام انني بوعاهد *** ذي سجـل عليـك اجوالـه
واما عن دخول امريكا *** مثل الماء اضنه واسهـل
ماهي معجزه يامسعد *** او حيـد امتطـي شلالـه
عندي من يرد النابـي *** مـن ذي لاتكلـم يفعـل
مثل الشيخ نصر الوافي *** واصحابي كثير امثالـه
ظنيتك تباني زورك *** نعقد حسـب قولـك مقيـل
تعمل لي ضيافة يسمع *** عنها المختبـي فادغالـه
لكن بيض الله وجهك *** جهزت العمـل والمعمـل
من بعد الوزاره حارس *** للصوفـي علـى بقالـه
من مسؤول وارجع حارس *** هذا المقترح ما يُعقل
بيلومك عليه العـزي *** والمجلـس مـع عقالـه
يكفي لاهنـا يامسعـد *** ولاعـاد سيلـي حمـل
مـاودي يشـل اودانـك *** ولا يغـرق البتـالـه
واتقبل سلامي واجد *** ماشخـب المخيلـه هملـل
واسقى كل وادي ضامي *** من مزنه ومن مسيالـه
واختمها بذكر الهادي *** طه المرتضـى والمرسـل
من ذكره يداوي قلبي *** صلى الله على احمد وآلـه

 

[وليدالمصري]

بد الشاعر القدير مسعد الاشول

ابدع القول بسـم الله قـال ابـن الاشـول
من توكل على الرحمن ما ضاق لـه بـال
مالك الملـك ذي يخلـق ويـرزق ويكفـل
صاحب الفضل ما يرجع من البـاب سئـال
يالله الحمدلك مارشـرش المـزن واهمـل
واقبلـت بعـده الدنيـا بخيراتهـا اقبـال
يامـن اكرمتنـا فضـل الكتـاب المنـزٌل
ذي به اسلافنا فـازوا علـى كـل محتـال
دمٌروا به عروش الظلـم كسـرى وهرقـل
اظهر العدل في وقـت العمـل بـه ولا زال
نور يهدا بـه السالـك طريقـه ويحصـل
للسعـاده ويجتـاز الحواجـز والاقـفـال
نور يهدا به العارف ومـن يجهلـه ضـل
امر مختار بيـن النـاس وابليـس شغٌـال
بعد ذا الساع قم ياراكـب المهـر الاحجـل
بالرسالـه وبلغهـا محـطـات الارســال
بثها فـي خبـر مسمـوع مقـري معلـل
في الجرايد ونسخه حطٌها بيـن الاسجـال
وان تريد البريد ارسلتهـا فـي المسجـل
او في الفاكس ذي توصل على سرعة الحال
او صواريـخ تجتـاح الجزيـره ويشعـل
بالصواريخ بتـرول المصافـي والاحقـال
والخليـج الـذي مـا حــرم الله حـلـل
يحرق السهـل والساحـل بليـزر ونابـال
ذي تعاون مع اسرائيـل والغـرب وابـذل
كل مايملكه مـن نفـط مخـزون او مـال
استعانـوا عــدوٌ الله دمٌــر وعـطٌـل
المصالـح ومـثـل بالمقاتـيـل مـثٌـال
دمٌروا شعب مسلـم بالصواريـخ واعـزل
من سلاحه في الداخل ومقطـوع الاوصـال
كـل هـذا علـى شـان الاميـر المنيٌـل
قبـح الله غمٌاضـت عيونـه والاسـبـال
ما اختلفنا علـى صـدام نفـرض مغفـل
انما الذنب مـا ذنـب الثكالـى والاطفـال
لكـن الان لاشـوف القـدر قـد تـحـول
معظم الجيش بالفتـره تحطـم والاسهـال
هكذا دعـوة المظلـوم فـي الحـال تقبـل
سنـة الله سبحـانـه لـمـا راد فـعٌـال
بعد ذا الساع يـا طـارش تخبـر وتسـأل
اين ابو صقر والصوفي صناديـد الابطـال
اولا يقبلـوا مـنـك تحـيـات الاشــول
بالرياحيـن ممزوجـه وبالـوردي العـال
قل لهم ايش هذا الصمت والشعـب يقتـل
هل هو الخوف او نسيان في الامر واهمال
انت مسؤل يابو صقر جـوٌب وانـا اسـأل
مسئله واضحه مـا عـاد تحتـاج فصٌـال
كيف نقدر نكفٌـر شخـص شهـد وهلـل
والله المطلـع فـوق السرايـر والاحـوال
ثانيا لو وزناهـم تقـول لـي مـن اثقـل
في كرامه وفـي نخـوه وتاريـخ وافعـال
ذا قريشي ولو جهلي ابـو جهـل افضـل
من سلولـي ومـن رجـال يعقـد برجـال
قوم لـوط الـذي ربـي مسخهـم وزلـزل
فـي قراهـم ولازالـت عبـاره للاجيـال
انت مسلم ولايمكـن مـن الحـق تزعـل
لو على النفـس مـالازم نحايـل ونحتـال
لا تفكر مصيـر الـرزق رزقـك مسهٌـل
مسألـه سريـه لله فــي رزق واجــال
او تعاطف مـع الثـوب الرهيـف المتلـل
احسن اللبس هذا الوقت فوطـه ودسمـال
عندي الصدق يابو صقر مفروض واسـأل
مسعد الحاج واسأل في المساجد والاعمـال
احمدالله انـا اصلـي فـي الصـف الاول
والعمل محترم شغلـي مـع نـاس عقٌـال
وانت عندي ذهب صافي وشاعـر مؤصـل
انما ارجوك لا تسلك علـى منهـج الخـال
ذي تمشـى مـع الباطـل وغنٌـى وطبـل
كان وزن الوقيـه يفعلـه تسعـه ارطـال
واصبحت محكمـه عليـا وقاضـي مؤهـل
للقضاء في مدى ليله وهـو كـان حمٌـال
واسـأل الله يغفـر لـه بمـا قـال او زل
والكراسـي بمـن فيهـا تحطـم وتنشـال
لا هنا قـال اخـو غالـب بدعهـا وقفـل
من فتح بـاب بعـد الفتـح للبـاب قفـال
ختمها فـي رسـول الله ذي هـو مفضٌـل
في صفاته وفي ذكره علـى كـل مرسـال
ماقري قـاري المصحـف وجـوٌد ورتـل
كـل مايذكـر الذاكـر عشيٌـه والاصـال



جواب الشاعر الكبير احمد محمد الصنبحي






قال ابو صقـر بسـم الله بالسطـر الاول
عالم اسرار عبـده والنوايـا والاعمـال
سيد الكون وحده بيـده الربـط والحـل
والعطاء والرضا بيـده وتحقيـق الامـال
والف صلي على المختار ماالحـاج هلـل
وابتهل في منى وادٌى صلاتـه والانفـال
بعد ذلحين يا حيا بقـاف ابـن الاشـول
ذي بعث لي من امريكه بعشرين شـوال
خصني به انا والصوفـي اللـي تجمٌـل
واتصل بـي وبلغنـي ببعثـه ومرسـال
قال مسعد شملنا وانت يا احمـد مخـول
من طرفنـا بغينـا رد شافـي وبالحـال
قلـت والله زهلتـه واعتبرنـي موكـل
ضد الاشول ولو هو رجل معدوم الامثـال
بانجـاوب بسرعـه والطحيـن المنخـل
بقلبـه ربمـا يحتـاج منخـل ونـخـال
مرحبـا بـه وبالقيفـان مرحـب مدبـل
مرحبا فوق عيني والحواجـب والاسبـال
بكرم الضيف اللي في مضافـي توصـل
والوفا ابقى لنا ما المـال فانـي وكمٌـال
وانت يا مرسلي جهـز ذلولـك وارحـل
شل باقه هديه زهـر مـن روس الاذوال
وانزل العاصمه واشنطن الزيـن واسـأل
اولبرايت الغبيـه دب غابـات وادغـال
قـل ياوزيـرة شايـب اغبـر مدعبـل
اخبرينـي ودلينـي فيـن البطـل حـال
واتجه لا محله واهـد لـه ميـة برسـل
عطر من عطرنا مخصوص للثوب والشال
قل له البدع جانـا والجـواب المفصٌـل
اسمعه ربما انه يشرح الصـدر والبـال
الاوله يا عزيزي هاجسـك زل واخمـل
في سموة وباصحاب الفخامـه والاجـلال
لانت عمٌيت ما خصيت حد كـان اجمـل
با نحلل وبا نسبح بها عـرض واطـوال
لكن الامر واضح وايش باسي وبااعمـل
يا رجال الحيل حالت علـى كـل محتـال
ماتركتـوا لنـا بالحـل مطلـع ومنـزل
قلتوا ان الخشب عوجا وهي مثل الاميال
ذا جزانا من امريكـه ومفـروض نقبـل
ماتقوله نيابه عنهـا يـا ابـن الاوعـال
حيـث والحريـه عنـد العروبـه مكبٌـل
بالسلاسل وحد السيف والجهـل مـازال
المغفـل سيبقـى طـول عمـره مغفـل
يخدم الغرب وامريكه ويلسن وجيشمـال
ماتوا اجدادنا ذي كانـوا المـوت الازول
لكن الصبر بايجي يوم والله ولـو طـال
لو جمال العرب باقـي واحمـد وفيصـل
ماتجرأ كلينتـون يقتـل ابـاء واطفـال
للاسف الزمن ذي كنـت حاسـي تحـول
كل شاجع مكبٌـل بالسلاسـل والاغـلال
من وراء اقطاب امٌه وضعنا اصبح مخلخل
والطمع بالكراسي بهـذل النـاس بهـذال
رجعوا ذاك الاستعمار في ثـوب مخمـل
واستعانوا بمجموعـة سكـارى وانـذال
واصبح المجتمع في حـد ذاتـه مشكٌـل
من جميع الدول جابوا لنا الوان واشكـال
بالعمالـه غرقنـا والعمـل مـا تحصٌـل
للعرب لو ترى كم من صناديـد اعطـال
والتزامـات لامريكـه واوروبـا تخيـل
يشفطـوا مـا معانـا بالتحـدي والاذلال
ما حدا من دولنا اوقـف الظلـم الاهبـل
هم مساكيـن والمصـري مـروٌج ودلال
لا يغرك مبـارك لا ضحـك لـك ومثـل
ظاهره غش والباطـن مشعـوذ ودجـال
باعهم بيعت المغرب وهو شـل ذي شـل
واصبح الفقر معهم بالعوالـي والاسفـال
ماالسؤال الموجه لـي جوابـه محصٌـل
با نصرٌح بما هو حـق والحـق ينقـال
والله ان العراق اكبـر واقـوى واثقـل
مالكويت اعترف ماله ثقل واهلـه اقـلال
لكـن الوقـت ذا غيٌـر وحـوٌل وبـدٌل
صاحب المال اثقل عند من يرغب المـال
اصبح القرش والدينـار ميزانـه اشـدل
كل واحد مـع الدينـار مـردف وميٌـال
للعراقي بعقلـه مـا غزاهـم ولا احتـل
ارضهم سته اشهور بالمدافـع والانـزال
احتلالـه لهـم مدخـل للاعـداء تكبٌـل
ضد صدام واسعـر بالوقيـه والارطـال
لو تصرف بحكمه كان مـا حـد تدخـل
في شئون العرب لكن ذهلنا بـه اذهـال
ضيـع المجتمـع بالدرولـه ذي تـدرول
اح ياريتهم ما عطـوه رخصـة دريـوال
الصواريخ ضاعت والرصاص المحزقـل
ما اخترق جورج واشنطن ولا طايره عال
لعنت الله على امريكه اضافـه لمـا حـل
بالولد بن كلينتون من فضايـح واجـدال
ريٌس امريكه اصبح شاذ جنسي وروفـل
شخص ماله ولامريكـه هنـا اي مثقـال
والمدام البريطانـي معـه يرقـد اسفـل
وايش ما قال صفق له وشارك بالاعمـال
لانهيار السوفيتي شجع القـرد الاعظـل
وانفرد بالسياسـه والتصـرف والافعـال
انما قل لهم شهر العسل ذي مضـى هـل
والصراع اكتمل بين الحضاره والاجيـال
بايقع به قضـاء مهمـا بقـي او تأجـل
لا يظنوا حساب الحـر مقطـوع الاجـال
بعد حلو العسل با يشربـوا مـر بالخـل
والندم باينوب الكلـب لاتقطـع اوصـال
وان بقي حي يـرزق ياعزيـزي تقبـل
التعـازي بتاريـخ العروبـه والابطـال
واسمهم احسبه من كـل خانـه تكنسـل
مايليقـون بـه لمـا يمـدون الاحبـال
ليس منا من انـوى بالملاييـن يفسـل
او تواطـأ مـع كافـر حرامـي ونشٌـال
ذا جوابـي وسامحنـي بمـا زاد او قـل
وانت مسؤل بايجاد التـوازن والاخـلال
صل عالمصطفى مارشرش المزن واهمل
خاتم الانبياء الموعـود بأكـرام واجـلال
نور عينـي وقرتهـا الشفيـع المفضٌـل
للعروبـه وللاسـلام والصـحـب والال

 

[وليدالمصري]

قصيده للشاعرعبده صالح الحالمي(ابوالعز) وهذه القصيده تعبر عن الوضع العربي ومأسيه



يقول ابو العز ياشوقى على سيل عارم=يزيل كل الهموم
ياشوق عينى على راعد وماطر وتاهم=سنه وعشرين يوم
يطهر الارض من رجس اهلها والمآثم=قبل القيامه تقوم
من ذل حكامنا فالموت افضل غنايم=والعيش ماله لزوم
الموت مغنم ولا العيشه مع حكم ظالم=للغرب اصبح خدوم
كم جهدنا كم نضلى بالحجاره نراجم=امام تلك الحجوم
فين العروبه وفين الجامعه والمعالم=والسربله والضموم
فين اشتراكات امتنا وفين القواسم=والعزم فين العزوم
فين الحيا ذى بقادتنا وفين المكارم=ليش اذعنوا للخصوم
بااصيح بالصوت واتكلم على كل حاكم=ابتاع بيع اللحوم
ابتاع للغرب باع الشعب باع المحارم=باع الحلى والهدوم
حقدا على اخوه تاجرفى جميع المواسم=ورد جميع السموم
قاد العدو لا اراضينا بغب المتالم=وزاد سلم رسوم
قدم لشارون خدمه ما عملهاش خادم=وبلغه مايروم
واليوم شارون داعس فوق ضهره ورازم=العار له والذموم
قهرى على جيش صدام الهمام الملاطم=ذى ضاع بين الغيوم
ما اضن من بعد ذاك الجيش نقدر نزاحم=ولا نصد الهجوم
مهما جمعنا عقالات العرب والعمايم=ماليث مثله يعوم
صدام ذى كان له هيبه وله امر حازم=لا قال صومى تصوم
اعوذ بالله من كيد النساء والتشاؤم=وغدر ابنا العموم
بااقول رأيى ولا بااخاف من لوم لايم=يلومنى من يلوم
ما باقى الا رعاة الماشيه والبهائم=بدمهم والشحوم
يحفضهم الله يعزوا مابقى من ولايم=يقاسموها سهوم
أنيت أنيت من اناتى القلب وارم=مرموم جسمى رموم
من كثرة الهم لا صاحى ولا انا بنايم=وكيف عينى تنوم
والقدس محتل وبغداد الحبيبه تصادم=والنسر فيها يحوم
وابو غريب يرتكب فيها من ابشع جرايم=تغتاض منهاالنجوم
ذى بايجوب على القاضى وله عقل فاهم=يزم راسه زموم
يامالك الملك ياحاكم على كل حاكم=ياحى دايم يدوم
خارجت يوسف من كيد اخوته وانت راحم = برحمتك للعموم
صدام عبدك مكبل بالسلاسل وجاثم=بسجن حاكم ظلوم
سالك الاهى تخاج عبدك الحر سالم=تأخذ بيده يقوم
واستغفرك واحمدك راجيك حسن الخواتم=العلم لك والعلوم


وهذا هو الجواب من الشاعر مسعد الاشول

قال ابن الاشول بحفظ الله ياطير عازم=فوق السحايب تعوم
بلغ سلامي على القاضي وباقت حماحم=بالعطر رش الهدوم
ذي فاز نجمه على ثابت عوض وابن سالم=تعيش يابو حلوم
صحيح لو قالوا القاضي مأهل وناظم=وفي كلامه جزوم
شاعر محنك وللباطل مكانه مقاوم=دفاع والا هجوم
وانا مع الحق باضحي ومفروض اساهم=وارسل بتسعه طقوم
مزوده بالقنابل هيدروجيني وكاتم=يرم خصمه رموم
شعّارنا الجيش والقاضي يكون الملازم=كالبدر بين النجوم
هو قال شوقه على راعد وماطر وتاهم=سنه وعشرين يوم
يطهر الارض من رجس اهلها والمأثم=قبل القيامه تقوم
وانا تمنيت في لحظه تجي ريح عاقم=والبحر موجه يقوم
يدمر الغرب يجتاح القرى والعواصم=يبيد غالي وشوم
والشرق زلزال تهلك به جميع الجراثم=تحرق بنار السموم
والموت يحزق على الحكام في عنف قاصم=افراد والا عموم
ويحرق النفط كله والذهب والمناجم=لا زاد خيره يدوم
من يوم شفناه ما شفنا معه يوم باسم=غير الحزن والهموم
دخله بتلعب به الحكام والشعب صايم=ماهل يشمه شموم
كم بالفلوجه وبالضفه تقع من جرايم=من العدو الغشوم
ولا تحرك لهم ساكن ولا فاق نايم=ضاعوا بليله ويوم
تمر الاعياد مانسمع بها الا مئاتم=وهم بلندن وروم
قبحهم الله مثقل دمهم ثقل رازم=مهما تحاول تنوم
وكلما راح ظالم يأخذ الحكم ظالم=قزوم تخلف قزوم
ولو نقارن بهم شارون والا مناحم=على مناحم شلوم
رغم ان شارون شايبقى على النار جاثم=لكن لشعبه خدوم
واحنا الخواجات معنا خادمين الدراهم=وعاريات الجسوم
والختم صلوا على المنسوب الى نسل هاشم=وللرسايل ختوم

 

[وليدالمصري]

منقول من صفحة الاستاذ صلاح العبادي
اسجل إعجابي برد الفتى الفذ مدرسة الأخلاق والتواضع رمز النبوغ والتفوق شاعر شباب المجلس اليمني وليد المصري على قصيدة الأستاذ مسعد الأشول والتي تعتبر من العيار الثقيل فعلا . وجاء الرد ليوازيها ويخاذيها وهذا يدل على طموح المصري المستمر نحو الأرقى والأفضل واحببت اعادتهما هنا حتى استطيع المقارنة ويستطيع الأحبة المتابعة . وعيد سعيد وكل عام والجميع بخير وبركة وسعة وتقدم ورقي وتفوق . محب الجميع ابو الفتوح


ابو محمد يقـول الصبـر عنـد المكـاره
مـــن سـيٌـمــات الــوقــار
والزهد من معدن الانسان عنـد انتصـاره
والـعـفـو فــــي الاقــتــدار
وانا احمد الله مـا شنٌـت مـزون المطـاره
مــا حـــن جـاهــم وثـــار
من يملك الصبر فـي دنيـاه يجنـي ثمـاره
فـــي يـــوم مـابــه ثـمــار
في يوم كلٌن يلقٌـى امـر غيـر اختيـاره
يــمــيــن والا يـــســـار
فيـه المياعيـد تتقـارب وفيـه البشـاره
وفــيــه جــنٌــه ونــــار
يا رب تلطف بنا مـن بردهـا والحـراره
ورمــيــهــا بــالــشــرار
يا صبر حتى ظلام الليـل يقلـع غـداره
ويـنـجــلــي بـالـنــهــار
نهار تطلع شموسه عنـد راغـب وكـاره
مـــن سـاعــة الاحـتـضــار
حديث مسنود عن سيد البشر الى خيـاره
وراويــــه مــــن بــخــار
والدين له خمسه اركانه وواحـد جـداره
نــعــد مـنـهــا فــقـــار
الاولـه نشهـد ان الله فـردي شـعـاره
بـــدون شـــك او غــبــار
وان محمـد نبـي المـنـذره والبـشـاره
ذي ارتــضـــى واسـتــخــار
والثاني الخمـس يتأديـن بعـد الطهـاره
وضـــــوء والاٌ عـــفـــار
والثالثه في زكـاة المـال نخـرج عشـاره
مـــن الـغـنــي لـلـمـضـار
والرابع الصوم نكمـل شهرنـا لا مـداره
وجــــاز فــيــه الـفـطــار
البعض يقضي قضاء والبعض يدفع كفـاره
دون الــهـــرم والـصــغــار
والخامس الحج من يقـدر يوفـر سبـاره
ومــركــبــه والايـــجـــار
وبعد هـذا صـلاة النفـل والاستخـاره
وفـــرض حـســن الــجــوار
وطاعة الوالدين افضـل فـروع التجـاره
لــلابــن طــايــع وبــــار
طريق مسلوك يـا عاشـق لجنـة قـراره
كـمــا طــريــق الـقـطــار
والان قوم يا رسول الخط واعمـل زيـاره
واخـتــر رفـيــق الـسٌـيــار
تقلع على لفتهانـزا تطـوي الجـو غـاره
تـوصــل دبــــي لـلـمـطـار
عمارة الطوب منشـوره بمعنـى النشـاره
ونــاطــحــاة الــمــثـــار
تعجب على البدو لمٌا يدخلـوا فالحضـاره
ويــحــصــل الانـــحـــدار
كيف المساجد وكيف الرقص جنب المنـاره
ومــنــتــزه لـلــقــمــار
من شان توني يصلي بعد صحـوة سكـاره
مـــع الـشـيــوخ الـكـبــار
وبوش قالوا قد اعلـن للخليـج الزيـاره
بــيــزورهــم فــــــي اذار
يتفقـد الجيـش ذي رجٌـع لمعتـل وزاره
والـمـقـرمــه والـــشـــذار
ليلة هرب منٌهـا حافـي ولابـس خمـاره
خـايــف مـــن الائـتـســار
يا رب ظالـم ومتكبـر وراكـب حمـاره
يـصـبـح فـريـســة حــمــار
والان نسأل على الصوفي وابو صقر جـاره
يــا خـيـر صـاحـب وجـــار
ذي انقذه من مكاريب ابن الاشول ونـاره
يــوم قـــام يـلـعـب بـنــار
يا هل ترى ذا دوع من مسعد او هي شطاره
او هـــو يــريــد اخـتـبــار
لمٌا عزمني على الملعـب وعطٌـف قشـاره
مــا مـــن جـهـنـم فـــرار
والشخص ذي قلت لا يفتق عليٌـا شفـاره
قــل لــه مـعــي ذو الـفـقـار
كلام مفهوم ما عنـدي كـلام استعـاره
لــمــن يــريــد الــحــوار
انا مـزود مـن القـران معظـم قصـاره
والـكــهــف والانـفــطــار
عندي صواريخ حمرا عابـرة كـل قـاره
مـــا بـعـدهـا الا الــدمــار
لو ينفلت للخبـر والعيـن منهـا شـراره
مـــا تـمـســي الا غــبــار
ضربت من قبلهن شمسان وامسه حجـاره
متنـعـثـره الــــى جــعــار
نزٌلت من فوقه المرحـوم ناكـس شعـاره
ومـعــلــن الانــكــســار
والان خذ من غصون الورد حالك حَمَـارِه
وعـطــر مــــن زنـجـبــار
وقل لـبو صقربعد الساع يسعـد نهـاره
بـالـخــيــر والازدهــــــار
لمٌا تكلـم فـي الهاتـف عرفـت العبـاره
وذاب دمـــــي وفــــــار
كيف المعيشه تحكٌم فـي شبـال النٌمـاره
وفــــي اســــود الـقـفــار
والجيد تكفيه يا جدعـان لمـح الاشـاره
ولـلــكــلام اخــتــصــار
امٌا جوابه وصل ذي قـال وافـي عيـاره
وانــــا قـلـبــت الـعـيــار
جواب مرغوب لكن جابنا ايسـر سُمـاره
للـقـاهـره مــــن ظــفــار
لا عند منحوسها ذي شـا يخـرب ديـاره
زلـــــزال والا انــفــجــار
كم له في الحكم لا نائـب ولا لـه وزاره
ولا مــعـــه مـسـتــشــار
واستغفـر الله مـن زلات قلبـي وثـاره
فــي ســـر او فـــي جـهــار
وختمها في من ازهـى الاميـه بالحضـاره
وجـــاء بـأجـمــل شــعــار
وحارب الجهل والطغيان رغـم انتشـاره
وشـــق دربــــه وســــار



تعقيب وليــــد المصري





سطح القمر قال اخوا راجي تحرك مـداره
وكـــــوكــــــب الارض دار
وبرج الارصـاد بالامـواج اشـر زراره
لــلــبــث دون احــتــكــار
عبر المحطات للعالـم باحـدث مهـاره
حــــــروف فـيـهـاابـتـكـار
اقوال شاعر ابد ماشـق شاعـر غبـاره
ولارجــــع فــــي قــــرار
جسارة القول تضهـر للمتابـع عسـاره
فــي قـلــب شـاعــر اشـــار
شاعر وله رعد منه الخصم يعلن فـراره
والـصـلـب يـلـقـى انـصـهــار
يحقق النصر ضد الخصم فـي عقـر داره
ويــعــلــن الانــتــصـــار
قصايده كالذهب مـوروث فيـه افتخـاره
مــايــوم لاقــــى انــدثــار
ابومحمـد همـام القبيلـه والجـسـاره
وبـالـبــلاغــه ضـــــــرار
اديبنـا فكـره الواعـي يبيـن وقــاره
وحـكـمــتــه تـســتــعــار
ياهاجسي من بحور الشعر طلـع امـاره
بـالـجـبـر مــالــك خــيــار
البدع راقي ومضمونـه تعلـى الصـداره
فــــــرد بـاعـلـىاعـتـبـار
ما انا بملزم ولا انا شخص كمل ضمـاره
واراد يـكــســب ضـــمـــار
وحب يدخل مع الشعـار لجـل اشتهـاره
يـصـيــر بــيــن الـكــبــار
ماحط نفسي مكـان الصنبحـي اوبثـاره
ارد دون انــــتــــضـــــار
ماهي صفاتي ولا نهجي ولا هي كبـاره
ولا لـــدربـــي مـــســــار
وانما شاقنـي موضـوع كلـه جـداره
ويـسـتــحــق اقـــتــــدار
رحبت بالقول ماشنت مـزون المطـاره
فــــي بــرهــا والـبـحــار
ماجذع يابس بفصل الصيف زاد اخضراره
والارض تـصــعــد بـــخـــار
مقدار مني لشاعر هيـم حيـا شمـاره
ومـثـلــه اربــــع دفـــــار
ماهومثيل الـذي بالخـط بنشـر اطـاره
والــقــول لاقــــي بــــوار
ياهل ترى خوف ولا هاجسه كان عـاره
ام ضـــده الــوقــت جــــار
ماقط شاعر على شاعر يطول انتضـاره
الا اذ ا الــعــقــل طــــــار
بالخص لا البدع في مضمون قوله نداره
وفــــي حــروفــه جــمــار
والان واجب نناقش قـول كلـه غـزاره
بـاحــدث فـيـهــا انـشـطــار
ياكم على البدو بن الاشول مكثف حـواره
وكــــم نـسـفـهـم وغــــار
رغم انهم في تطور قطرهـم وازدهـاره
قــــد عــاشــو الازدهــــار
وقدعنـى قنصليتهـم وتلـك السـفـاره
ذي ســبــبــت لـنـهــيــار
تخاذل االمسلمين اليـوم اكبـر خسـاره
استـجـلـبـت كــــل عــــار
وعصر الابطال بالخذلان شفنـا انهيـاره
والـلـيـث فـــي يـــد فـــار
مابنلـوم ارض تبقـى للخليفـه ديـاره
فـــي ضــــل هـذاالـحـصـار
الغزو دمر عقـول المسلميـن الحيـاره
فــــــي كــــــل وادي ودار
تلقى التقاليد منزوعـه وتلقـى الفتـاره
والــعــرف فــــي انــهــدار
ودين الاسلام في ارضه مشـدد خصـاره
وقــدوتــه فــــي شــجــار
اخبار تاره تجيب الحزن واليـاس تـاره
فــــي لــيــل ولا نــهـــار
هذا من الوضع كم بالشعر وضح نـزاره
وكــــم تــحــدث نـــــزار
سهر مع القافيه خوقيس حتـى سحـاره
ولاتـــنـــاول ســـحــــار
من باطل الوقت ذي خلا البشر في بطاره
والـحـلــم فــــي انــحــدار
دنيا ونفس البشرفيهـا محـل الهـواره
وطــــــول الافــــــواه وار
عاش الوطن عاش بالوحده وعاشت دياره
عــشــرون ثــانــي ايــــار
يوم اتحاد الوطن من بعد طول انشطـاره
مــن بـعــد لـعــب الـقـمـار
هذا مقال الفتي المصري بحسب اقتـداره
والــفــل حــولــه ســــوار
ورحمة الله تغشـى الخالـدي لامـزاره
وتــوصــلــه لــلــمـــزار
والختم اصلي على المختارسيد البشـاره
والـتـابـعـيــن الــخــيـــار

 

[وليدالمصري]

[POEM="font="Simplified Arabic,5,black,bold,normal" bkcolor="transparent" bkimage="./images/backgrounds/65.gif" border="double,4,gray" type=1 line=1 align=center use=ex num="0,black""]
قال الاشول قضيت العمر من دون راحه=ليت والله ولو ساعات في عمري ارتاح
ما شكيت العمل ولا سنين الفلاحه=افضل ايام عمري يوم انا كنت فلاّح
كان ظل الشجر في النفس كُلّه مراحه=والنسيم النّقي يأتي كما المسك نفّاح
اعتني بالعنب واجنيه موسم نجاحه=والفواكه محيطه بي سفرجل وتفّاح
كنت محتل في بحر القوافي مساحه=انطوى حبلي الشعري وانا كنت سبّاح
حنّ قلبي كما حنّت سَفِينْ الملاحه=آح لما جبال الارض تنهد وتنزاح
ما شفاني من الباطل طبيب الجراحه=لو صرف بالدوى او شرّح القلب شرّاح
ليت والارض تتدمر وتبقى براحه=طال ما عدلها مفقود والظلم يجتاح
ارضنا والعدو خلّى دمانا مباحه=حطّنا في قفص مقفول من دون مفتاح
رحّبو فيه قادتنا وحلّو نكاحه=قبل ما يعرفوا قدر الخساره والارباح
للاسف بعد ما كنّا لسان الفصاحه=ضاع تاريخ دوّناه في حبر والواح
تشهده قرطبه والكون يشهد فساحه=ذي كسيناه ثوب الستر بعد التشلاّح
كم من اطفال فالاحضان تذبح ذباحه=والسلاطين والحكّام في الغرب سوّاح
كم ثكالى في الاقصى تنادي صلاحه=راحة القدس والنهرين من بعدها راح
والعرب للعرب كلاً موجّه سلاحه=ارتوى النخل والزيتون من دم الارواح
واصبح الشعب مثل الطير فاقد جناحه=وانت تصوّر معيّا طير مقطوع الاجناح
ان صمتنا يعيب الصدر ضيق انشراحه=وان بكينا بُكا فالدمع هو دمع تمساح
كلمة الصدق لازم قولها في صراحه=في العقيده خلل والدّين يحتاج صحّاح
طالما فرصة التوبة معانا متاحه=نغتنمها وربّ الكون عافي وسمّاح
ختمها بالنبي ما الفجر يشرق صباحه=واعقب الليل من بعد الغسق نور وضّاح

[وليدالمصري]

(((((((((((((((((((((((((((((((( الذل والهوان ))))))))))))))))))))))))))))))))))))))

قال ابن الاشول الله المستعان@@@@@ حظه في التعبير خانه ==================

ذي حسّب الشيعه معانا كِنان @@@@@ ونعتنق نفس الدّيانه ===================

ما فكّر انّ الخلق مثل البنان @@@@@ ولا تعجّب في بنانه ====================

ولا سِمع من وضحو في البيان @@@@ في المنتدئ قبل الصيانه =================

انّ المجوسي واليهودي قِران@ @@@ يمشون في نفس اللّعانه ==================

القول حالي والخبائث بطان @@@@@ أبدو من الخنزير أذانه ===================

في فجر يوم العيد قبل الاِذان @@@@ ظهر دنسهم والنتانه ===================

والقتل يوم العيد شغل الجبان @@@@ فاقد شعوره واتّزانه ====================

ياللأسف ما حد تجرّئ وادان @@@@ هذه الجريمه والهيانه ====================

ذي قام با لتنفيذ كلب أسفهان @@@@ وبوش خطط له واعانه ===================

واقزامنا كمّن طليق اللسان @@@@ بالصّمت معقوده لِسانه ====================

ما دام بطنه والحقيبه ملان @@@@ له شأن والمظلوم شأنه ====================

هذاعلى الاُمّه بلئ وامتحان @@@@ حتئ توفي بالأمانه ======================

بعد الشدائد يقبلين السّمان @@@@ والظلم يتحطّم كيانه